Son zamanlar Azərbaycanda soyuqdəymə, qızdırma, boğaz ağrızı və s. simpotmlarla müşayiət olunan virus geniş vüsət alıb.

Çoxları bu xəstəliyin yeni virus olduğunu iddia edir və 1 ay ərzində çətinliklə sağaldıqlarını bildirirlər.

Təkcə son iki gün ərzində isə 3 nəfərin qeyd olunan simptomların təsirində naməlum virusdan həyatlarını itirdikləri barədə mediada məlumatlar yayılıb.

TƏBİB-dən Lent.az-ın sorğusuna cavab olaraq deyilib ki, respirator virus xəstəliklərinin yayılması mövsümi xarakter daşıyır. Kliniki əlamətlərə əsasən bədən hərarətində yüksəlmə, öskürək, halsızlıq, burun axıntısı və tıxanıqlığı, boğaz ağrısı aiddir. Lakin bu simptomlara görə xəstəliyə hansı virusun səbəb olduğunu təyin etmək çətindir. Virus təyin olunsa belə bu xəstəliklərin etioloji müalicəsi olmadığına görə beynəlxalq təşkilatların tövsiyələrində laborator diaqnostikaya çox da yer verilmir.

Onu da əlavə edək ki, sözügedən xəstəliklər əsasən ev şəraitində müəyyən bir müddət ərzində öz-özünə sağala bilir. Lakin xroniki xəstəliyə malik və ya immun sistemi zəif olan insanlarda xəstəliyin ağırlaşma ehtimalı yüksəkdir.

Buna görə də kliniki simptomlarda aqresivləşmə hiss edilən xəstələrin həkimə müraciət etməsi mütləqdir. Belə xəstələr həkim-mütəxəssis tərəfindən zamanında dəyərləndirilməli, stasionar və ya ambulator müalicə qərarı verilməli, xəstəliyə ciddi nəzarət olunmalıdır.