İyulun 6-da Şuşada son illər ölkə prezidenti, türk dünyasının təəssübkeşi İlham Əliyevin növbəti uğuru kimi “Türk Dövlətləri Təşkilatının qeyri-rəsmi Zirvə görüşünün Qarabağ Bəyannaməsi”nin imzalanma mərasimi baş tutdu. Bəli, bu tədbir də Azərbaycanın dünyada tutduğu yolun doğru və ədalətli olduğunu bir daha sübut etdi. Çox qürurverici haldır ki, Türk Dövlətləri Təşkilatının “Nəqliyyat, bağlantı və iqlim fəaliyyəti vasitəsilə dayanıqlı gələcəyin qurulması” mövzusunda qeyri-rəsmi Zirvə görüşü məhz Azərbaycan Respublikasının təşəbbüsü ilə 2024-cü il iyulun 6-da Şuşada keçirilmişdir.
Görüşə Azərbaycan Respublikasının Prezidenti İlham Əliyevin ev sahibliyi ilə Qazaxıstan Respublikasının Prezidenti Kasım-Jomart Tokayev, Qırğız Respublikasının Prezidenti Sadır Japarov, Özbəkistan Respublikasının Prezidenti Şavkat Mirziyoyev, Türkiyə Respublikasının Vitse-prezidenti Cevdet Yılmaz, Macarıstanın Baş naziri Viktor Orban, Şimali Kipr Türk Cümhuriyyətinin Prezidenti Ersin Tatar, eləcə də Türk Dövlətləri Təşkilatının Baş katibi Kubanıçbek Ömüralıyev iştirak etmişlər.
Vaxtılə Ulu Öndər dövlətimizin xarici siyasət strategiyasını formalaşdırarkən türk dövlətləri ilə əlaqələri prioritet hesab etmiş və mühüm töhfələr vermişdir. Bu gün də Azərbaycanın xarici siyasətinin əsas istiqamətlərindən biri türk dünyasının birliyi, onun siyasi, iqtisadi və hərbi qüdrətinin artırılması, qlobal arenada güc mərkəzinə çevrilməsi naminə səylərin birləşdirilməsidir. Bu, dövlət başçısı İlham Əliyevin həyata keçirdiyi çoxşaxəli xarici siyasət kursunda prioritet istiqamətdir.Görülən işlərin uğurlu nəticəsi kimi bu gün türk dövlətlərinin başçılarının işğaldan azad edilmiş ərazilərimizə, Qarabağın tacı Şuşaya səfərləri türk dövlətləri arasında birliyin, qardaşlığın və dostluğun bariz nümunəsidir.
Düşünürəm ki, Qarabağ Bəyannaməsi, qəbul edilən qərarlar türk dünyasının həmrəyliyini daha da gücləndirərək Azərbaycan-Türkiyə dostluğunun, qardaşlığının, müttəfiqliyinin təsdiqi olan Şuşa Bəyannaməsinin, Qarabağ Bəyannaməsinin Qarabağın tacı olan Şuşada imzalanması mədəniyyət beşiyimizin önəmini bir daha nümayiş etdirdi. Zirvə görüşündəki liderlərin çıxışında bunlar bir daha aydın şəkildə ifadə edilərək, dünyaya mesaj oldu.
Açığını demək lazımdır ki, türk dövlətlərinin bu əhəmiyyətli görüşləri həmişə olduğu kimi indi də Amerika və Avropanın müəyyən dairələrini qıcıqlandırdı. Təəssüflər olsun ki, ermənipərəst dairələrdən qardaş Macarıstanın baş nazirinin bu tədbirdə iştirakına kölgə salmaq kimi mənfur niyyətlər də ortaya qoyuldu.
Hazırda qarşıda dayanan prioritet məsələlərdən biri də Şərq-Qərb nəqliyyat dəhlizinin genişləndirilməsidir. Dünyanın maraq dairəsində olan bir layihə kimi bu reallıqlar, Xəzər dənizində 50-dən çox ticarət gəmisi olan Azərbaycanın türk dövlətləri üçün önəmli tranzit xidmətləri göstərə bimək imkanının olması kimi vacib məsələlər bir daha tədbir iştirakçılarına çatdırıldı.
Ümidvarıq ki, Şuşada imzalanan Qarabağ Bəyannaməsi də digər sənədlər kimi tarixi əhəmiyyət daşıyacaq və ölkəmizin dünyadakı mövqeyini daha da artıracaqdır.

Şahbaz Balakişiyev,
“Peşə təhsili və insan kapitalı” jurnalının baş redaktoru,
filologiya üzrə fəlsəfə doktoru