BMT Baş Assambleyasının Nyu-Yorkda keçirilən sessiyası çərçivəsində Türkiyə prezidenti Rəcəb Tayyip Ərdoğanla Ermənistan baş naziri Nikol Paşinyan görüşəcək. Görüşdə Cənubi Qafqazda sülh prosesi, Ankara-İrəvan münasibətlərinin normallaşması, sərhədlərin açılması müzakirə ediləcək.

Ankaranın tələbi məlumdur: Bakının şərtləri çərçivəsində sülh əldə edildikdə, yaxud ən azı sülh sazişi layihəsi razılaşdırıldıqda, İrəvanla normallaşma praktiki müstəvidə irəliləyəcək;

İrəvan Ankara ilə üçüncü tərəf – Bakı olmadan danışıqlara və sərhədlərin açılmasına çalışır;

Ermənistan Azərbaycanın maraqları nəzərə alınmadan normallaşma prosesinə razı salmaq məqsədilə iki istiqamətdə işləyir.

Birincisi, diplomatik danışıqlardır: Paşinyanın Ərdoğanla görüşdən umduğu da budur, hərçənd, bu yolla nəticə əldə etməyin mümkün olmadığını da anlayırlar;
İkincisi və ən çox ümid etdikləri Qərbdən Ankaraya təzyiqin edilməsidir: erməni diasporu/lobbisi bu planda İrəvanla paralel şəkildə işləyir;

Paşinyanın Ərdoğanla görüşdüyü gün Avropa İttifaqı ölkələrinin Ermənistandakı səfirlərini Türkiyə ilə sərhədə – “Marqara” keçid məntəqəsinə aparması da bu kontekstdə təsadüfi deyil. İrəvan bununla Türkiyə ilə sərhədin açılmasında “üzərinə düşən hər şeyi” etdiyini nümayiş etdirir və Qərbə “Ankaranın razı salınmasına dəstək verin” mesajı ötürür.