Rusiya Dövlət Dumasının deputatları sahibsiz heyvanları yedizdirməyə görə cəza tətbiq etməyi təklif edirlər.

Bu barədə RBC məlumat yayıb.

Nəşr bildirir ki, Dövlət Dumasının sahibsiz heyvanlarla bağlı qanunvericiliyin təkmilləşdirilməsi üzrə işçi qrupu qanun layihəsinə bir sıra düzəlişləri dəstəkləyib.

Təklif olunan dəyişikliklərə sığınacaqlarda evsiz heyvanların evtanaziyası üçün əsasların genişləndirilməsi də daxildir. 498 saylı qanunun hazırkı redaksiyasında yalnız heyvanın dözülməz iztirablara məruz qaldığı hallarda öldürülməsinə icazə verilir. Yeni dəyişiklik bu tədbirin insanlara, əmlaka və ya digər heyvanlara zərər vuran və ya təhlükə törədən heyvanlara şamil edilməsinə icazə verir.

Sahibi olmayan istənilən heyvanın tutulması təklif edilir. Küçədə tutulmuş heyvanın sahibinin olduğu anlaşılsa belə, geri qaytarma yalnız müəyyən edilmiş müddət ərzində rəsmi müraciət əsasında mümkün olacaq. Eyni zamanda, sahibinin üç gün ərzində heyvanın itməsi barədə məlumat verməli olduğu bir qayda tətbiq ediləcək – bunu etməmək ev heyvanını qəsdən tərk etmək kimi qiymətləndiriləcək.

Bundan əlavə, deputatlar sahibsiz heyvanların yemlənməsini qadağan edən qanunun qəbulunu zəruri hesab edirlər. Bunu edənlər cərimələnə bilər. Həmçinin vətəndaşlar tərəfindən sahibsiz heyvanların tutulmasına mane olmaq cəhdlərinin qadağan edilməsi də nəzərdə tutulur.

Xatırladaq ki, bəhs edilən qanun layihəsi martın əvvəlində Dövlət Dumasına təqdim edilib.