Ermənistan Ərazi İdarəetmə və İnfrastruktur Nazirliyində İrəvan və Dehli arasında hava dəhlizinin işə salınmasına dair razılaşmaya dair məlumat yoxdur.

Bu barədə “Sputnik Ermənistan”-ın sorğusuna cavabda deyilir.

Bundan əvvəl, martın 10-da Hindistanın IADN agentliyi Hindistanın Ermənistana strateji əhəmiyyətli ixracat üçün hava dəhlizi açması barədə məlumat yayıb. Bu məqsədlə ölkələr arasında logistikanı gücləndirmək üçün HALCON işçi qrupu yaradılıb.

“Sputnik Ermənistan” aidiyyatı idarələrdən söhbətin hansı hava dəhlizindən getdiyini, hazırda hansı işlərin aparıldığını və bunun Ermənistan üçün hansı əhəmiyyət kəsb edəcəyini soruşub.

Ermənistanın Ərazi İdarəetmə və İnfrastruktur Nazirliyindən bildirilib ki, onlarda belə bir məlumat yoxdur.

“Eyni zamanda qeyd edirik ki, Ermənistanın hava məkanı həm tranzit, həm də qeyri-tranzit mülki uçuşlar üçün açıqdır. Qeyri-mülki təyyarələrlə uçuşlara icazə Xarici İşlər Nazirliyi tərəfindən verilir”, – cavabda deyilir.

Ermənistan Xarici İşlər Nazirliyi isə cavab olaraq sadəcə qeyd edib ki, Ermənistan və Hindistan arasında kifayət qədər aktiv qarşılıqlı fəaliyyət gündəliyi mövcuddur.