İraq İran və İsrail arasında qarşıdurma meydanına çevrilə bilər.

Bu barədə Səudiyyə Ərəbistanının “Şərq Əl-Avsat” nəşrində dərc olunan məqalədə qeyd olunub.

Bir sıra siyasətçilər bildiriblər ki, səmasının və ərazisinin İran raketləri üçün əsas və bəlkə də yeganə giriş nöqtəsinə çevriləcəyini nəzərə alaraq, İranın İsrailə qarşı cavab tədbirləri görəcəyi təqdirdə İraq regionun ən qaynar ölkələrindən biri olacaq.

İraq vətəndaşlarının əksəriyyəti İran və İsrail arasında başlaya biləcək müharibədən narahat görünür. Amma sosial şəbəkələrdə Tehranın İsrailə gözlənilən cavabının əhəmiyyətini və ciddiliyini lazımınca qiymətləndirən İran əleyhdarları ilə Təl-Əvivin ciddi şəkildə cəzalandırılacağına inanan tərəfdarları arasında açıq konflikt var.

Mənbə “Şərq Əl-Avsat”a bildirib ki, “İranın aprelin ortalarında İsrailə hücumu zamanı bütün raketlər İraqın hava məkandan keçdiyi kimi, ölkə ərazisi müharibə vəziyyətində də əlçatan olacaq”.

“İranın istənilən raket hücumu iki yolla həyata keçiriləcək: ya İraq ərazisi üzərindən idarə olunan raketlərlə, ya da bu ərazilərin içindən iranpərəst qruplar tərəfindən atılan raketlərlə. Hər iki halda hökumətin fraksiya qərarlarına nəzarət etməməsi və ya onları cilovlaya bilməsini nəzərə alsaq, bununla məşğul olmaq çox çətin olacaq”, – mənbə nəşrə bildirib.

O qeyd edib ki, genişmiqyaslı və idarəolunmaz müharibənin başlanması İsraili İraqdakı həyati maraqlara birbaşa hücuma sövq edə bilər.

“Bir müddətdir ki, biz İsrailin Yəmənin Hudeydə limanında olduğu kimi, İraq qrupları ilə İranın xeyrinə açıq münaqişəyə girəcəyi təqdirdə Bəsrə limanlarını vurmaqla hədələdiyini eşitmişik. İraq bütövlükdə hökumət siyasəti baxımından neytral ölkədir. Konstitusiyaya görə, müharibə və sülhün elan edilməsi parlamentin qərarından asılıdır. Belə olan halda İraq hökuməti vəziyyəti izləyir və böyük miqyasda, hətta məhdud miqyasda müharibə başlayarsa, qruplaşmaları və İranı müharibəyə cəlb etməməyə sövq etməyə çalışır”, – keçmiş İraq diplomatı Qazi Feysal deyib.

Feysal hesab edir ki, İraq hökuməti Fələstin hüququnu vurğulamaqla müharibədən qaçmaq istəyir: “Lakin təəssüf ki, fraksiyaların Tehranla münasibətləri ilə bağlı mürəkkəbliyə görə müharibə vəziyyətində İraqın mövqeyi birləşməyəcək”.