Azərbaycan və Ermənistan gələcəkdə “İbrahim sazişi”nə qoşula bilər.

Bunu Trampın xüsusi elçisi Stiv Uitkoff “Breitbart News”a müsahibəsində deyib.

“Mən təxmin edirəm ki, biz nisbətən tezliklə Livanda və hətta Suriyada vəziyyətin normallaşması potensialını görəcəyik. Onlardan güclü müsbət reaksiya gəldi. Bu, Liviya ilə də baş verə bilər. Bu baş verə bilər və mən “İbrahim sazişi”nə qoşulan ölkələr haqqında danışıram. Bu, Azərbaycan və Ermənistanla da baş verə bilər. Bunu həll etməyə çox, çox yaxın olduğumuza inanırıq” – Uitkoff deyib.

ABŞ-ın xüsusi nümayəndəsinin sözlərinə görə, bu, ölkə prezidenti Donald Tramp üçün çox mühüm təşəbbüsdür və o, buna inanır.

“Bu, bütövlükdə regionda sülh və sabitliyə töhfə verir. Biz buradayıq və mənim çox, çox yaxşı komandam var. Mən həqiqətən əminəm ki, yaxın bir neçə ayda dörd və ya beş, bəlkə də altı ölkə Trampın xarici siyasətinə dair mühüm təşəbbüsləri imzalayacaq”, – Uitkoff yekunlaşdırdı. ‏

“İbrahim Sazişi” 2020-2021-ci illərdə İsrail və bir sıra ərəb dövlətləri arasında ABŞ-ın vasitəçiliyi ilə imzalanıb. Müqavilənin adı yəhudilik, xristianlıq və islamda adı keçən İbrahim peyğəmbərə istinaddır.