Ermənistan, Yunanıstan və Kipr arasında müdafiə məsələləri üzrə məsləhətləşmələr aparılıb və nəticədə üçtərəfli əməkdaşlıq proqramı imzalanıb.

Bu barədə cümə günü Ermənistan Müdafiə Nazirliyinin mətbuat xidməti məlumat yayıb.

Aydınlaşdırılır ki, dekabrın 19-da Afinada əvvəlcə Ermənistan və Yunanıstan arasında ikitərəfli, daha sonra isə Ermənistan-Yunanıstan-Kipr üçtərəfli məsləhətləşmələri keçirilib. Məsləhətləşmələrdə Ermənistan Müdafiə Nazirliyindən Müdafiə Siyasəti və Beynəlxalq Əməkdaşlıq Departamentinin rəhbəri Levon Ayvazyanın rəhbərlik etdiyi nümayəndə heyəti iştirak edib.

Məsləhətləşmələr zamanı 2024-cü il üçün müdafiə ilə bağlı əməkdaşlıq sahəsində işlərin nəticələri və 2025-ci il üçün planlar müzakirə edilib.

“Məsləhətləşmələrin sonunda Ermənistan-Yunanıstan ikitərəfli əməkdaşlıq və 2025-ci il üçün Ermənistan-Yunanıstan-Kipr üçtərəfli əməkdaşlıq proqramları imzalanıb ki, bu proqramlara silahlı qüvvələrin fəaliyyətinin müxtəlif sahələrinə bir neçə tədbir daxildir”, – məlumatda deyilir.

Bundan əlavə, müdafiə sektorunda yeni yanaşma və standartların tətbiqi məsələləri müzakirə olunub.

Ayvazyan həmkarlarına Ermənistan ordusunun transformasiyası prosesini təqdim edərək, Yunanıstan və Kiprdən olan tərəfdaşların, xüsusən də ordunun müxtəlif sahələrinin hazırlanmasında dəstəyinə ümid etdiyini bildirib.

Son zamanlar baş verən regional və beynəlxalq hərbi-siyasi hadisələr mövzusuna toxunulub.

Tərəflər müntəzəm müdafiə məsləhətləşmələrinin vacibliyini vurğulayıblar.