“Telegram”ın yaradıcısı Pavel Durovun saxlanması onu Fransa təhlükəsizlik qüvvələri ilə əlaqə yaratmağa və onlara “Telegram” istifadəçilərinin kimliyini müəyyən etməyə kömək edəcək məlumatları təqdim etməyə məcbur edib.

Bu barədə “Libération” məlumat yayıb.

Nəşrin məlumatına görə, son vaxtlara qədər Durovun messenceri hüquq-mühafizə orqanlarının sorğularına məhəl qoymurdu, lakin indi “Telegram” “görünməmiş əməkdaşlığa” başlayıb və sorğulara cavab verir.

Platforma milli polisin Yetkinlik yaşına çatmayanlar idarəsinin (Ofmin) və jandarmeriyanın bir sıra cinayət araşdırmalarında sorğularına cavab verib və şübhəliləri müəyyən etməyə kömək edə biləcək məlumatları təqdim edib. Xüsusilə, uşaqlara qarşı cinayətlərdən söhbət gedir.

Paris prokurorluğunun kibercinayətkarlıqla mübarizə şöbəsinin rəhbəri Joanna Brousse “Libération”a “Qapı həqiqətən açılır” deyib.

Qəzet qeyd edir ki, bütün Fransa təhlükəsizlik qüvvələrinə “Telegram”dan məlumat ala bilmədiyi üçün dayandırılmış araşdırmaları bərpa etmək tövsiyə olunub.

Xatırladaq ki, Pavel Durov avqustun 24-də “Le Burje” hava limanında şəxsi təyyarəsindən enərkən saxlanılıb. O, messencerdə qeyri-qanuni məzmunu qəsdən tənzimləməməkdə ittiham olunub.

“Libération” əvvəl yazmışdı ki, “Telegram”ın qurucusu “həbsdən şoka düşüb”, çünki messencerin Fransa əks-kəşfiyyatı ilə əlaqə kanalı var idi.