NASA , Ay və Marsda elektrik enerjisi istehsal etmək üçün kiçik nüvə reaktoru qurmağı hədəfləyən Səthdə Parçalanma Gücü Layihəsinin birinci mərhələsinin tamamlandığını elan edib.

Bu barədə Phys.org-un press-relizində məlumat verilib.

İlkin mərhələ 2022-ci ildə başlayıb. O zaman NASA beş milyon dollar dəyərində üç müqavilə imzalayıb və tərəfdaşlarına nüvə reaktorunun dizaynı, o cümlədən enerjiyə çevrilmə, istiliyin çıxarılması, enerjiyə nəzarət və paylama sistemləri, xərclər və inkişaf cədvəli üzərində düşünməyi tapşırıb. Plana görə, belə bir reaktor insanın Ayda ən azı on il uzunmüddətli olması üçün şərait yaratmalıdır.

Reaktorun çəkisi altı tondan az olmalıdır və qurğunun özü nümayiş məqsədilə 40 kilovat elektrik enerjisi, həmçinin Ay bazalarını, roverləri, ehtiyat şəbəkələri və elmi təcrübələri gücləndirmək üçün əlavə güc istehsal edə bilməlidir.

NASA, 2025-ci ildə Ayda nümayiş üçün reaktorun layihələndirilməsini nəzərdə tutan 2-ci fazaya keçmək məqsədi ilə daha çox məlumat toplamaq üçün 1-ci faza müqavilələrinin hamısını uzatmağı planlaşdırır. Reaktorun buraxılış meydançasına çatdırılması üçün hədəf tarix 2030-cu illərin əvvəlidir. Ayın özündə reaktor bir il nümayiş rejimində işləyəcək, ondan sonra isə doqquz illik istismar müddəti olacaq. Layihə uğurlu olarsa, reaktorun dizaynı Marsda istifadə üçün yenilənəcək.

NASA həmçinin “Rolls Royce North American Technologies”, “Brayton Energy” və “General Electric” şirkətləri ilə “Brayton” qapalı dövrəli enerji çeviricilərini inkişaf etdirmək üçün müqavilələr bağlayıb. Mövcud dizayn çoxlu istilik sərf edir, buna görə şirkətlərə konvertorları daha səmərəli etmək tapşırılıb.