Xalqımız bu günlərdə Zəfər və Bayraq bayramını, Konstitusiya gününü böyük ruh yüksəkliyi və qürurla qeyd edir. Bu gün Qarabağda, Şərqi Zəngəzurda, bütövlükdə Azərbaycanda, dünyada yaşayan dalğalanan, dünyanın müxtəlif ölkələrində yaşayan soydaşlarımız tərəfindən müqəddəs rəmz olan bayrağımız dövlətimizin, dövlətçiliyimizin simvoludur. Azərbaycan bu fərəhli günlərə addım-addım irəliləmiş və məqsədinə nail olmuşdur. 27 il gedilən bu yol heç də asan olmamışdır. İlk növbədə ölkədə daxili sabitlik yaratmaq, milli birliyə, həmrəyliyə nail olmaq, dağlmış iqtisadiyyatı dirçəltmək, nizamlı və hərtərəfli təmin olunmuş ordu qurmaq, beynəlxalq aləmdə Azərbaycana qarşı neqativ münasibəti dəyişmək lazım idi. Ulu Öndər Heydər Əliyevin başladığı bu çətin və şərəfli missiyanı Prezident, Ali Baş Komandan İlham Əliyev davam edərək, çox məharətlə, yüksək siyasi iradə və qətiyyət göstərərək qarşıya qoyulan müqəddəs məqsədə doğru gedirdi. 2020-ci ilin 27 sentyabrında başlayan Vətən Müharibəsi ilə Azərbaycan yeni tarix yazdı. Artıq iki ildir ki, qürurla yaşayırıq, alnımız açıq, başımız dikdir. Bunu canını və sağlamlığını qurban verən igid, cəsur əsgər və zabitlərimizə borcluyuq!

Cənab Prezidentin dediyi kimi “Hərbçilərimiz ölümə gedirdilər, “öldü var, döndü yoxdur” şüarı ilə döyüşlərə gedirdilər, bir nəfər də olsun fərari olmamışdır. Bu, xalqımızın qəhrəmanlığıdır və onu göstərir ki, elə gözəl gənc nəsil yetişdi ki, onların bir çoxları Qarabağı, Zəngəzuru heç vaxt görməmişdilər, televiziyalarda, fotoşəkillərdə, valideynlərin, böyüklərin söhbətlərində bu müqəddəs torpağa yaxınlaşırdılar. Ancaq onlar gəldilər və xalqımızın tarixi missiyasını şərəflə yerinə yetirdilər”.Onların hər biri bir tarix, bir dastan yazdı!

Azərbaycan Prezidentinin çıxışlarını təkcə biz yox, həm də region dövlətləri, dünya dövlətləri gözləyir. Strateji əhəmiyyətə malik olan regionumuzun dünyada gedən proseslərdən uzaq tutmaq, güclər balansında ciddi dəyişikliklərlə müşahidə olunan geosiyasi müstəvidə mövqeyinə maneə yaratmaq istəyi alınmadı. Çünki hər kəs yaxşı dərk edir ki, Cənubi Qafqazın nəbzini Bakı müəyyən edir. Bu, heç də hamının hesablaşmaq istəmədiyi reallıqdır. Bunun üçün müxtəlif üsullardan – təxribatlardan, təhdidlərdən və hətta açıq hədələrdən istifadə olunur. Lakin bütün bunlar 44 günlük müharibədə qələbə çalmış Xalqımızın, güclü, qalib ordumuzun Müzəffər Ali Baş Komandanın, məharətli siyasətçi və qətiyyətli ölkə başçısı İlham Əliyevin sıx birliyi ilə daha da güclü olan Azərbaycan dövləti bir çoxlarını narahat edir. Ona görə də heç bir şübhə yoxdur ki, Prezident İlham Əliyevin noyabrın 8-də Şuşada söylədiyi hər bir söz lentə alınıb və hazırda müxtəlif səviyyələrdə təhlil edilir.

Dövlət başçısının çıxışında çox aydın və məqsədyönlü mesajlar var idi. Siyasi etika və diplomatiya qanunlarının öz qaydaları var. Azərbaycanın mövqeyini “yoxlamaq” istəyən hər kəs öz ünvanına deyilmiş məsələləri bir daha eşitdi. Noyabrın 10-da faktiki olaraq Ermənistanın kapitulyasiya aktına çevrilmiş Üçtərəfli Bəyanatın imzalanmasının ikinci ili tamam oldu. Ötən müddət ərzində Azərbaycan sülh naminə öz üzərinə götürdüyü öhdəlikləri yerinə yetirdiyi halda, təəssüf ki, digər tərəf vaxt qazanmağa çalışır, nəyəsə ümid edir. Keçən dövrdə baş verən hadisələr, Ermənistanda baş qaldıran revanşist hərəkətlər, onun havadarlarının apardığı məkrli oyunlar göz önündədir. Amma nəzərə almadılar ki, rəsmi Bakı bunu çox gözəl bilir. O zaman bu, müharibəni uzatmaqdan və yeni qurbanlardan qaçmağın yeganə yolu idi. Bu bizim qələbəmiz idi və qalan məsələləri ağır itkilər olmadan addım-addım etmək olardı. Bütün bu iki il ərzində Prezident İlham Əliyevin istər siyasi, istər iqtisadi, istərəsə də quruculuq müstəvilərində böyük əzmlə gördüyü işlər, həyata keçirdiyi layihələr bir daha ölkəmizin real potensialının göstəricisidir. Lakin yenə də 2020-ci ilin payızında olduğu kimi, bu gün də Azərbaycana qarşı ciddi təzyiqlər var. Dövlət başçısının İkinci Qarabağ müharibəsinin 44 günü ərzində gərginlik və təzyiqlərə necə cavab verdiyini, mübarizə apardığını hamımız yaxşı bilirik. Bu gün Azərbaycanın Qələbəsini, inkişafını, yaratdığı yeni reallığı, regiondakı strateji mövqeyini həzm edə bilməyənlər dövlətimizə qarşı çıxır, onu zəiflətməyə çalışırlar. Dövlət başçısı isə yenə də zərbəyə tab gətirməli, çağırışlara və təhdidlərə cavab verməlidir. Necə ki bunu çox məharətlə edir!

“Qarabağ bizim torpağımızdır. Rusiya sülhməramlıları orada müvəqqəti yerləşdirilib, 10 noyabr 2020-ci il tarixli Bəyanatda onların qalma müddəti göstərilib və onlar (yəni ermənilər) kiməsə bel bağlasalar, yenə faciə ilə üzləşəcəklər”. Bu sözləri Prezident İlham Əliyev Şuşada deyib. Bununla da ölkə başçısi təkcə Ermənistana deyil, hər kəsə aydın şəkildə izah etdi ki, Rusiya sülhməramlılarının Azərbaycan ərazilərində mövcud olmayan mandatının uzadılmasına ümid bağlamasınlar. Odur ki, erməni tərəfi heç kimə arxayın olmasın, Azərbaycanla münasibət qurmağa çalışsın hər hansı oyuna alət olmasın. Hər şey İrəvandan göründüyü qədər sadə deyil. Prezident İlham Əliyev “yeni çətir axtarışına” çıxan qonşuların nəzərinə bunu çatdırdı.

Prezident İlham Əliyev müharibədə uduzmuş Ermənistanın üçtərəfli Bəyanat üzrə üzərinə götürdüyü öhdəlikləri yerinə yetirmədiyinə bir daha diqqəti cəlb edib. O, yalnız işğal altında olan Ağdam, Kəlbəcər və Laçın rayonlarının könüllü azad edilməsi ilə bağlı bəndləri yerinə yetirib. Amma bu, xoş niyyətli bir hərəkət deyildi. Erməni tərəfi, Azərbaycan liderinin çox dəqiq qeyd etdiyi kimi, qorxuya qapılmışdı. Azərbaycan ordusunun gücü, ölkə başçısının iradəsi erməniləri bu üç rayonu döyüşsüz azad etməyə məcbur etdi.

“Ermənistan silahlı qüvvələri Qarabağda nə edir? Bizim səbrimiz hədsiz deyil və mən bir daha xəbərdarlıq etmək istəyirəm ki, bu öhdəlik yerinə yetirilməsə, o zaman Azərbaycan lazımi addımları atacaq. Ermənistan öz beynəlxalq öhdəliklərini yerinə yetirmir. Ermənistan İkinci Qarabağ müharibəsində məğlub olub, ordusu məğlub olub. Məğlub olan ölkə özünü belə apara bilməz. Ona görə də bizim bütün addımlarımız haqlıdır. Düzdür, Ermənistanın bəzi xarici havadarları bizi nədəsə ittiham etmək istəyirlər. Mən onlara da cavab verdim, yenə cavab verəcəm. Bu, mənə mane olmayacaq”, – bu fikirləri də Prezident İlham Əliyev Şuşada deyib. Onun bu sözləri erməni maraqlarının digər müdafiəçisi Fransaya mesajdır. Rəsmi Paris ermənilərin özündən daha çox erməni kimi görünmək istəyir. Nə üçün? Erməni seçicilərin səsi naminə, yoxsa bu islamofobiya və türkofobiyadır? Bu isteriya heç nəyə gətirib çıxarmadı, çünki Azərbaycan haqlıdır, beynəlxalq hüquq onun tərəfindədir və buna heç kim heç nə edə bilməz. Azərbaycana qarşı bütün ittihamlar məhz bu beynəlxalq hüquqa ziddir. Biz burada diktə edirik, burada əsas qüvvə bizik, lazım gələrsə, bir daha güc nümayiş etdirib istədiyimizə nail olacağıq, deyə dövlət başçısı bildirib. “Bunu hamı bilir və sərhədimizdə Ermənistana dəstək üçün hərbi təlimlər keçirənlər də bunu bilməlidirlər. Bizi heç kim qorxuda bilməz” deyən Prezident İlham Əliyev açıq şəkildə xəbərdarlıq edərək ermənilərə möcüzə gözləməməyi tövsiyə etdi. kiminsə gəlib onların yerinə döyüşməyəcək, “və döyüşsə, yenə qarşısında Azərbaycan ordusunu görəcək”. Burada ekstremist dini təbliğatdan başqa heç vaxt rıçaqları olmayan İran Azərbaycanı hərbi güclə hədələyərək Ermənistanın bütün müdafiəçilərindən daha da irəli gedib. Bir sözlə, bütün alıcılar öz “açıqcalarını” alıblar. Bunu Ermənistan, Rusiya və İran mediasındakı şərhlərdən və analitiklərdən qiymətləndirmək olar. Ermənilərə gəlincə, Azərbaycan prezidentinin onlar üçün ən önəmli mesajı belədir: “Biz sülh istəyirik, müharibə istəmirik. Sülh, ədalətli sülh. Bizim irəli sürdüyümüz şərtlər ədalətlidir, beynəlxalq hüquqa söykənir və bu şərtlər əsasında sülh müqaviləsi imzalanmalıdır. Ermənistan xoş niyyət göstərsə, imzalanacaq, olmasa da, imzalanmayacaq. Bundan sonra nə olacağını həyat göstərəcək”.

Prezident İlham Əliyev erməni tərəfini seçim qarşısında qoydu: ya sülh müqaviləsi Bakının təklif etdiyi beş prinsip əsasında imzalanır, ya da imzalanmayacaq. Ölkəmizin qarşısında genişmiqyaslı vəzifələr durur, böyük işlər görülür, erməni tərəfinin şıltaqlığından çox az asılı olan layihələr həyata keçirilir. Və hətta bu kiçik faiz də Azərbaycanın düşmənin ümid etmək istədiyindən daha çox imkanlara malik olduğu imkanlarla kompensasiya edilə bilər. Ermənistana bir dəfə xəbərdarlıq edilmişdi ki, onun inadkarlığı onu gələcəkdə daha çətin seçimlər qarşısında qoyacaq. Və belə də oldu. Azərbaycan növbəti dəfə Ermənistana ya uzunmüddətli sülh və ya dövlətçiliyin itirilməsi seçimini təklif edir, lakin sabah Ermənistanın artıq bu seçimi olmaya bilər.

Deməli, qonşular da Azərbaycan prezidentinin açıqlamalarını əbəs yerə oxumurlar. Çünki bu çıxışlarda onların bu günü və gələcəyi ilə bağlı hər şeyi ehtiva edir. Amma bu gələcəyin indikindən daha pis olmasın deyə, onlar eşitdiklərindən düzgün nəticə çıxarılmalıdır. Məhz Üçtərəfli Sülh Bəyanatının imzalanmasından keçən iki müddətdə Azərbaycanın Qarabağ və Şərqi Zəngəzurda apardığı quruculuq işlərinin aparıldığı, Cənubi Qafqazda ölkəmizin mövqeyinin daha güclənməsi, söz və nüfuz sahibi olduğu, iqtisadi imkanlarımızın artması fonunda və bununla yanaşı olaraq dalana çevrilən Ermənistanın bu barədə düşünmək üçün çoxlu səbəblər var.

Hicran Hüseynova,

Milli Məclisin Ailə, qadın və uşaq məsələlər komitəsinin sədri, professor