Biz ilin bütün fəsillərində vaxtaşırı xəstələnirik. Xəstələndikdə isə həkimlərin yardımına ehtiyacımız olur. Biz isə heç düşünmürük ki, həkimlər də digər insanlar kimi xəstələnə bilirlər. Hətta, onların işləri gərginlik və stress tələb etdiyi üçün adi insanlardan daha çox həkimlər xəstələnirlər. Buna səbəb isə həkim peşəsinin çətin və məsuliyyət tələb etməsidir.

Həkimlər də bizim kimi adi insanlardır. Bunu xüsusi qeyd edim ki, yaxşı və ya bir-neçə diplomun olması həkimin səhv etməməsi demək deyil. Buna səbəb isə onun savadsızlığı da deyil.
Əsl təbib özü üçün yaşamır. O, həmişə kiminsə dadına yetmək, kiməsə kömək etmək, insanların sağlamlığını qorumaq barədə düşünür. Bizləri vaxtsız ölümün pəncəsindən xilas etməyə çalışır. Elə bu yolda öz ömrü şam kimi əriyir, amma təəssüflənmir.

Bəlkə, doğrudan da həkimlərin həyatınıın gözəlliyi də şan-şöhrəti də bundadır?

Bu gün Azərbaycanda xeyli sayda mammoloq-onkoloq həkimləri çalışır. Şübhəsiz ki, hər hansı bir insanda bu və ya digər narahatlıq olanda ilk növbədə həkim-onkoloqlara müraciət edir. O, da öz növbəsində geniş dünyagörüşünə malik olmalı və klinikanı yaxşı bilməlidir.
Xəstəliklərin simptomlarının təxminən eyni və oxşar olmasına baxmayaraq ağıllı, təfəkkürlü onkoloq xəstənin düzgün müayinəsini apardıqdan sonra yönləndirməlidir.
Poliklinika, klinikalarda çalışan həkim-onkoloqlar yüksək intellektual biliyə, təhsilə və dünyagörüşünə malik olan həkim olmalıdır.

Xəstələrin ümidi, işıqlı nəzərləri həkimlərdən sağlamlıq umur. Sağlamlığımızın keşiyində duran, yaşamağımızın qayğısına qalan, gələcəyimizin təminatçısı olan həkimlərimizdən bir də Onkoloq, tibb üzrə fəlsəfə doktoru, Azərbaycan Tibb Universitenin (ATU) Onkoloji Klinikasının həkimi Günay Əhmədovadır.

Gəlin müsahibimizi daha yaxından tanıyaq!…
Günay Əhmədova Azərbaycan Dövlət Tibb Universitetinin Müalicə işi fakültəsinə 1999-cu ildə daxil olub və oranı 2005-ci ildə akademik dərəcəli diplomla müvəffəqiyyətlə bitirib. Həkim ailəsində dünyaya göz açmış müsahibimiz 2006-2008-ci illərdə Tibb Universitetinin Onkologiya kafedrasında Klinik ordinatura keçib. 2008-2012-ci illərdə həmin kafedrada aspiranturada təhsil alıb, tibb üzrə fəlsəfə doktoru adını qazanıb.Hazırda Tibb Universitetinin Onkoloji Klinikasında mammoloq-onkoloq vəzifəsində çalışır.

Müsahibimin sözlərinə görə valideynləri ona deyirdi :-“Qızım, həkimlik peşəsi gözəldir, şərəflidir. Belə şəfqətli xasiyyətinlə səndən gözəl həkim olar. Həkim hərtərəfli biliklərə malik olmalıdır. Bunun üçün insan daim mütaliə edib, yeni biliklərə can atmalıdır. Bununla belə insanları müalicə edərkən yiyələndiyi biliklər, qazandığı təcrübə və humanizmi onların dərdlərinə əlac etməlidir”. Valideynlərinin bu hikmətli tövsiyələrinə əməl etməklə, müsahibimiz həkim olub.

Media əməkdaşı olaraq, Günay həkim haqqında yazmaq mənə çox xoşdur. O, bacarıqlı həkim-onkoloq olmaqla yanaşı, eyni zamanda sadə və qayğıkeş anadır.
İşlədiyi hər yerdə kollektivin dərin hörmət və rəğbətini qazanmışdır. O, həkim üçün lazım olan müsbət keyfiyyətləri özündə cəmləşdirib. Günay həkim həyatını insanların sağlamlığı keşiyində dayanmağa həsr edib.
Onun müalicəsi nəticəsində ayağa qalxan xəstələr əminliklə deyə bilərəm ki, həyatda yaşamağın şirinliyini qazanıblar.

Əməklərinə verilən qiymətdən söhbət düşərsə deyə bilərəm ki, Günay həkimin ən böyük mükafatı xəstələrin minnətdarlıqları, onların ailə üzvlərinin xoş sözləridir.
Bəli, həkim ömrü bu minnətdarlıqlar, şəfa həsrətli xoş sözlər içərisində şam kimi əriyib gedir. Damla-damla başqalarının canına hopub, ona yeni həyat bəxş edir.
Bəli, Günay Əhmədova xalqımızın, dövlətimizin sağlamlığının xidmətində dayanan vicdanlı həkimlərimizdən biridir. Sağaldıb ayağa qaldırdığı xəstələrin hər biri isə onun mükafatıdır!

Sonda Günay həkimi bütün jurnalistlər və kollektivimiz adından 17 iyun Səhiyyə işçilərinin peşə bayramı münasibətilə səmimi qəlbdən təbrik edirəm.Ona möhkəm can sağlığı, işlərində yeni-yeni müvəffəqiyyətlər arzulayıram…Sağ olun ki, varsınız. O qızıl əlləriniz heç vaxt dərd görməsin.
Sizin kimi həkimlərə Səhiyyəmizin ehtiyacı çoxdur. Allah uğurlarınızı, nailiyyətlərinizi hər zaman davamlı etsin DOKTORUM!..

Hörmətlə:“Azərbaycan İnformasiya Agentliyi”nin,
Xüsusi Müxbiri Aybəniz Füzuliqızı Abdulova.