AzTimes.az xəbər verir ki, oktyabrın 28-də ADA Universitetində “#Çili: xalq və mənzərə” adlı fotosərginin açılış mərasimində Milli Məclisin Ailə, qadın və uşaq məsələləri komitəsinin sədri, professor Hicran Hüseynova ölkəmizdə fəaliyyət göstərən diplomatik korpusun nümayəndələri, dini və milli icma rəhbərləri ilə birlikdə iştirak edib.
Qeyd edək ki, fotosərgi ADA Universitetinin, Bakı Beynəlxalq Multikulturalizm Mərkəzinin, İnkişaf və Diplomatiya İnstitutunun və Çili Respublikasının ölkəmizdəki səfirliyinin birgə təşkilatçılığı ilə açılıb. Fotosərgidə Çilinin zəngin təbiəti, xalqının yaşam tərzi və maraqlı məkanları nümayiş etdirilib.

Tədbirdə çıxış edən ADA Universitetinin prorektoru, İnkişaf və Diplomatiya İnstitutunun direktoru Fariz İsmayılzadə bildirib ki, ADA bir çox beynəlxalq tədbirlərə ev sahibliyi edib. Qeyd edilib ki, hazırda Azərbaycan və Çili arasında bir çox sahələrdə əməkdaşlıq mövcuddur. Bu sərgi ictimaiyyətin Çili haqqında təsəvvürünü daha da zənginləşdirəcək.
Çili Respublikasının Azərbaycandakı səfiri Rodriqo Arkos ölkəsinin beynəlxalq təşkilatlarda Azərbaycanı dəstəklədiyini diqqətə çatdırıb: “Bizim münasibətimiz hər il daha da inkişaf edir. Bu gün açılan sərgi Çilinin həyatını təsəvvür etməyinizə kömək edəcək. Bu sərgidə Çilidə yaşayan insanların yaşayış tərzini, mədəniyyətini, relyefini, coğrafiyasını daha yaxından görəcəksiniz”.

Multikulturalizm Mərkəzinin müşaviri Aytən Qəhrəman çıxışında bildirib ki, bu fotosərginin təşkili Çili haqqında bilikləri artıracaq. Azərbaycan özünün multikulturalizm modeli ilə dünyaya örnəkdir. Ölkəmizdə əsrlər boyu digər xalqların mədəniyyətinə hörmətlə yanaşılıb. Bugünkü sərginin təşkili Çilini və sənəti sevənlər üçün gözəl təşəbbüsdür”.

Milli Məclisin Ailə, qadın və uşaq məsələləri komitəsinin sədri, professor Hicran Hüseynova:
“Tədbirin keçirilməsində göstərdikləri dəstəyə görə bütün təşkilatçılara, zəhməti olan hər kəsə öz təşəkkürümü bildirirəm”